Google
 

Tuesday, March 20, 2007

اعترافات ليليلة

المدونة ديه مش هاتبقى زى أى مدونة
لانها هاتكون مدونة بتاعتنا كلنا
مدونة كلنا نقدر نتكلم فيها ونعترف
نعترف باى حاجة مضايقانة
أى حاجة نفسنا نتكلم عنها
أى مشكلة واقفة فى طريقنا ونفسنا نزيحها
المدونة ديه ليكم وليا
وعلشان نعترف بأمان كل واحد هايكون معاه اليوزرنيم والباسورد يدخل يحط البوست ويخرج ولا كأنه كتب حاجة
اعترف براحتك واستنى ردودنا
مش أنت لوحدك اللى عايز تعترف .. كلنا عايزين نعترف
وانا سميتها اعترافات ليليلة
علشان كلنا بنستخدم النت بليل
مااحنا كلنا عارفين أن اليل دائما حليم ستار

4 comments:

عبدالله said...

اعترافات ليليه
بثينه كامل
:)
مبروك البلوج انا قولت اجي اقص الشريط بقي
ايه رايك تبداي انتي الاول في اعترافاتك
مستنين نسمع منك

تحياتي

Anonymous said...

esm el mdwana shadeny awyy...isa tetmly e3trafat :D...bs matwdehash 3la amn el dawlaa

tear82 said...

بسم الله الرحمن الرحيم

انا بنت عندي دلوقتي 25 سنه .. كنت متفوقه الحمد لله في دراستي و محبش الفشل ابدا ابدا ..عندي مشاكل في حياتي و بعترف انها اساسها عندي انا مش من بره ..اولها و الي بدات من حوالي 10 سنين لما كنت لسه في تانيه اعدادي و سافرو باب و ماما في شغل حوالي سنه و سابونا انا و اختي عند جدتنا و في السنه دي حصلتلي كل حاجه وحشه في حياتي بعد ما كنت برريئة و اكتر من بريئة كنت طفله تخاف حتى تسيب من ايد مامتها في الشارع بقيت (( وحشه اوي !! ))
في السنه دي قربت اكتر من مرات عمي !!! متستغربوش كانت شابه صغيرة بس للاسف كانت اخلاقها مش اخلاقنا و كانت العيله كلها معترضه عليها بس خلاص المهم انها علمتني اسوء عاده عرفتها (معاكسات التلفون ) و اتعودت عليها وبقت ادمان !!!
و عدت السنين و انا بعمل كده و اكتشفوا اهلي الموضوع و عاقبوني بشده خصوصا ان ماما بتصلي و قريبه اوي من ربنا و اختي كمان و انا و الله رغم ده و كنت بصلي بس المهم اني فضلت اعاكس في التلفون بس دايما كان قصدي من ورا كده مش التسالي زي مرات عمي لكن بحكم سني الصغير و عقلي الصغير كنت فاكره اني ممكن اقابل شخص كويس و احبه خصوصا اني عمري ما اتكلمت في حاجه وحشه كل كلامي كان محترم في التعليم او في مواضيع عامه و مكحدش كان بيحس اني لسه صغيره عشان كان كلامي اكبر من عمري ..

المهم عدت السنين و دخلت الكليه و كنت ضد اي علاقات في الجامعة و كان الكل بيحلف باخلاقي لاني فعلا عمري ما عملت علاقه و حشه و كانت النقطه الوحيده في حياتي هي موضوع المعاكسات والي قلت كتير بعد ما كبرت ..
و اتخطبت و 3 مرات و فسخت و كان اخرها واحد عرفته عن طريق التلفون برده بس كانت علاقه محترمه و كان طبعا ميعرفش اني اقصد اعكس عشان عايزه اتكلم مع حد و ادور على حب حقيقي لكن كان فاهم اني طلبت رقمه غلط !!
و اعتبرت ان دي الكدبه الوحيده عليه و لاني مش هعمل حاجه غلط و مش قصدي حاجه وحشه ضميري مكنش تعبني اوي لاني و الله كنت محترمه و مخلصاله .. بس المهم ان الخطوبه اتفسخت برده لاسباب عائليه ..
و من ساعتها و انا فعلا تبت الي الله و بعدت عن موضوع التلفون ...

بعدها تطور الموضوع و بقيت ادخل على النت و اتعرف علي شباب بس كنت بختار الشباب الي بحس انهم بيتكلموا انجليزي و باحترام عشان مدخلش في كلام وحش مع مستويات مقرفه يعني كنت بختار الي ممكن احس انهم بيتكلموا باحترام .. المهم برده بدات اتعرف و التعرف يتطور و يوصل للتليفون للبعض الي اتعرف عليهم و الكلام بينا يطول و يستمر بس كان بكل احترام و دخلت في علاقات حب كانت هنتتهي بارتباط رسمي لكن كانت برده بتنتهي لاسباب خارجيه و عائلية .. و كان كل الي بتعرف عليهم حتى بعد ما بنسيب بعض بيرجعوا بعد فترة يتصلوا بيا و يسلموا ويتمنولي الخير عشان فعلا كنت محترمه معاهم و طيبة واخلاقي تخليهم يتمنولي الخير و ده كلامهم ..

المهم يعني عايزه اعترف من ده كله ان مشكلتي الاولى اني (( معرفش اعيش من غير راجل في حياتي يحبني و يهتم بيا و يكون حابب يكلمني )) مقدرش اعيش حياتي في فراغ و هو ده الي خلاني طول السنين الي فاتت اني افضل ادور على الحب في التلفون و النت ..

نيجي بقا للمشكله التانية .. هي اني بعد ما سافرت مع اهلي لبلد عربي فضلت فترة طويله في فراغ فظيع من غير شغل و لا اصحاب مكنش قدامي غير النت و اتعرفت برده على ناس كتير و كانوا من نفس جنسيتي طبعا فكنت انا بالنسبالهم حاجه مهمه عشان الغربه وكده و كانوا محترمين لاني و الحمد لله بحاول اختار كويس الانسان من كلامهو اسلوبه و تلميحاته اذا كان بيتلكك على كلام وحش و لا فعلا بيحترم نفسه ... وكنت بعتبر ده مجرد ملئ فراغ وخلاص يعني و كانت رغبتي في الحب و ايماني بيه بالطريقة دي ابتدا يقل عشان فشل التجارب الي فاتت ..

المهم اني اتعرفت من النت على واحد محترم جدا جدا و شاب من نفس جنسيتي في البلد الي احنا موجودين فيها دلوقتي و اتخطبتله بعد تعارف سنتين في النت و بعد ما شفته مرتين من بعيد لبعيد و مرتين عن قرب و اتكلمنا مع بعض و لحد دلوقتي و الله العظيم و لا حتي سلام بالايد ..

هتقولولي طيب ايه المشكله نيجي بقا للمشكله التانية (( انا عيانه بمرض عدم الثقه بنفسي فدايما ده بيبان عليا باني عايزه دايما اكون محور اهتمامه و بكون حساسه تجاه اي كلمه يقولهالي وبقلبها نكد لو متصلش بيا و بخاف انه يسبني و علطول في مشاكل بسبب غيرتي عليه و احتياجي للاهتمام رغم اني ابان في تصرفاتي اني واثق من نفسي لدرجه الغرور لكن انا بعمل كده و انا من جوايا عارفه اني مش واثقة من نفسي )) المهم انه بصراحه طيب و بيحبني جدا لانيو الحمد لله بشهادة الكل جادعه اوي و محترمه و طيبه جدا و كمان دمي خفيف و انا تقريبا حبية كل اصحاب ي بس مشطكلتي دي بتظهر بس مع الراجل الي بحبه لاني دايما عندي احساس و عقده اني لازم هفقد الي بحبه و انه هيسبني فدايما ببقا عايزه ابينله اني ممكن اسيبه قبل ما يسبني و علطول في اغلب خلافي معاه اقوله خلاص احنا لسه في الاول ممكن نسيب بعض لو انت تعبان و ابينله اني مش هتعب من كده لكن بيكون جوايا بتقطع لاني بقول كده عشان بكون حاسه ان الموضوع على كرامتي مع انها تصرفات عاديه و مش مقصوده منه لكن انا حساسه ..

احيانا كتير بحس اني نكدية زي ما بيقولوا على الستات لكن انا و الله مش بحب النكد بالعكس انا دمي خفيف جدا بس بخاااااااااااف من الفراق و كرامتي دايما شايلاها فوق مناخيري ...

انا دلوقتي بعترف و احنا زعلانين مع بعض برده و مش برد عليه رغم اني بستنى مكالمته!!!

شوفولي حل و النبي عشان خايفه سيبني و يزهق من اسلوبي و تبقا الرابعة و الرابعة تابته !!!! و انا بصراحه بحبه اوي و الله ...

الحامولى said...

ازيك يازينا انا عبدالحليم
والله عرفتك على طول لو مكنتشى زينا فعرفى ان فى واحدة اسمها زينا زيك بالظبط
abdelhalim_2002@yahoo.com